BE flet për sulmin nga serbët në veri, ka një thirrje për institucionet


Mbi 50 plumba në drejtim të bjeshkatarëve

Incidenti i ndodhur të dielën ndaj një grupi të bjeshkatarëve që ishin duke ecur në rrethinën e Zubin Potokut në veri të vendit, ka ngjallur reagime të shumta.

Gjuajtja me armë nga një qytetar ndaj grupit të bjeshkatarëve, ka shkaktuar frikë tek sportistët duke i detyruar grupin prej rreth 50 personave që të kthehen prapa, shkruan lajmi.net.

E për këtë incident ka folur edhe Bashkimi Evropian, i cili në një përgjigje për lajmi.net e ka dënuar këtë akt të dhunës.

BE thotë se inkurajon autoritetet përkatëse të nivelit qendror dhe lokal që të punojnë në drejtim të garantimit të lirisë së lëvizjes dhe sigurisë për secilin qytetar të Kosovës.

“Bashkimi Evropian dënon çdo akt të dhunës. Incidenti që ju i jeni referuar aktualisht është nën hetim nga Policia e Kosovës. Ne inkurajojmë autoritetet përkatëse të nivelit qëndror dhe lokal të punojnë në drejtim të garantimit të lirisë së lëvizjes dhe të punohet për sigurinë e secilit banor të Kosovës”, thuhet në përgjigjen e BE-së.

Për incidentin në veri është kritikuar edhe Policia e Kosovës, për të cilët ishte raportuar se pas marrjes së informacionit nga pjesëtarët e grupit, nuk kishin shkuar menjëherë në vendin e ngjarjes.

Por, në një reagim për media nga Policia e Kosovës kanë deklaruar se pjesëtarë të policisë kanë shkuar në vendngjarje por nuk kanë gjetur asnjë gëzhojë.

Sipas njoftimit të policisë, deri më tani në polici kanë raportuar rreth 10 pjesëtarë të grupit që kanë qenë prezent kur kishte ndodhur incidenti.

Kujtojmë se raportimet në media kanë zbuluar detaje nga burimet të cilat kanë thënë se në veri të vendit vepron një grup kriminal i përbërë nga anëtarë serb, i quajtur “Mbrojtja Civile”, për të cilët është thënë se janë të informuar për çdo ngjarje në pjesën veriore të Kosovës.

Lajmi.net ka drejtuar pyetje edhe tek Policia e Kosovës për të parë nëse janë të informuar rreth këtij grupi që dyshohet se vepron në veri, por deri më tani policia nuk ka kthyer përgjigje.


Na lexoni...

Edhe informacione tjera

Mundesia me shume...
Pamje me shume...