Takimi i radhës i “Ballkanit të Hapur” mbahet javën e ardhshme në Tiranë, ja për çfarë diskutojnë

Ballkani i Hapur, sërish do të kenë takim.

Takimi ministror i nismës rajonale të Ballkanit të Hapur për energjinë dhe ushqimin do të mbahet javën e ardhshme në Tiranë, njoftoi sot Ministri i Ekonomisë i Maqedonisë së Veriut, Kreshnik Bekteshi.

Ai u tha gazetarëve se javën e ardhshme në Tiranë, si pjesë e nismës Ballkani i Hapur, do të mbahen takime pune të ministrave kompetentë nga Maqedonia e Veriut, Shqipëria dhe Serbia, ku do të “shqyrtojnë dhe propozojnë plotësimin e nevojave për ushqim dhe energji elektrike të qytetarëve të vendet e rajonit”, raporton Danas, përcjell lajmi.net.

Udhëheqësit e anëtarëve të nismës Ballkani i Hapur, Serbia, Maqedonia e Veriut dhe Shqipëria, ranë dakord në samitin e Ohrit më 8 qershor për të luftuar së bashku kundër krizës ekonomike dhe mungesës së ushqimit dhe energjisë.

“Ne presim një dimër shumë të vështirë dhe të paparashikueshëm në aspektin energjetik, i cili nuk varet vetëm nga Maqedonia e Veriut apo vendet e rajonit, por varet edhe nga mënyra se si do të zhvillohet situata me luftën në Ukrainë”, tha Bekteshi.

Ai theksoi se nuk priten kufizime të energjisë elektrike, edhe nëse ndalohet importi i energjisë elektrike dhe gazit në Maqedoninë e Veriut.

“Në gusht do të kërkojmë sërish shpalljen e gjendjes së krizës në sektorin elektroenergjetik për të pasur mundësi të intervenohet përmes masave shtesë për rritjen e prodhimit të energjisë elektrike nga kapacitetet e Maqedonisë”, tha Bekteshi.