Gjykata e Lartë e Venezuelës konfirmoi se Nicolas Maduro fitoi zgjedhjet presidenciale

Gjykata e Lartë e Venezuelës konfirmoi këtë të enjte se Nicolas Maduro fitoi zgjedhjet presidenciale të mbajtura në atë vend më 28 korrik, duke deklaruar se rezultatet e votimit të publikuara në internet, sipas të cilave Maduro humbi, ishin të falsifikuara.

Gjykata e Lartë mori vendimin e sotëm në përgjigje të kërkesës së Maduros për të rishikuar numrin e përgjithshëm të votave të hedhura në zgjedhjet presidenciale të 28 korrikut, pasi opozita publikoi të dhënat e votimit në internet nga 80 për qind e qendrave të votimit, të cilat treguan se kandidati i opozitës Edmundo Gonzalez fitoi me shumicë dërrmuese.
Gonzalez nuk mori pjesë në rishikimin e votimit, thanë gjyqtarët e Gjykatës së Lartë, të cilët akuzuan kandidatin e opozitës se po përpiqej të përhapte panik, raportoi AP.

Shtetet e Bashkuara kanë përgatitur një listë me rreth 60 zyrtarë të qeverisë venezueliane dhe anëtarët e familjeve të tyre që mund të goditen nga masat e para ndëshkuese pas zgjedhjeve të diskutueshme presidenciale të vendit të Amerikës së Jugut. Lista e propozuar përfshin zyrtarë nga Këshilli Kombëtar Zgjedhor (CNE) dhe Gjykata e Lartë, të cilët u përfshinë në shkaktimin e kaosit pas zgjedhjeve.

Ditët e fundit, Ministria e Financave e SHBA-së i ka dorëzuar Departamentit të Shtetit një draft sanksionesh me listën e të sanksionuarve, duke vënë në dukje se mund të rritet numri i personave që do t’i nënshtrohen masave ndëshkimore. Sanksionet amerikane do të përfshijnë një ndalim udhëtimi për zyrtarët e sanksionuar dhe anëtarët e familjeve të tyre dhe një ndalim të kompanive amerikane që të bëjnë biznes me ta.

CNE shpalli presidentin aktual Nicolás Maduro fitues të zgjedhjeve të 28 korrikut pa i publikuar rezultatet e votimit nga qendrat e votimit individual.

Gjykata e Lartë e Venezuelës filloi shqyrtimin e rezultateve të zgjedhjeve këtë muaj.

SHBA dhe vende të tjera kundërshtuan pretendimet e Maduros për të fituar zgjedhjet./abcnews.al