Qytetarët e Maqedonisë, të pakënaqur nga shërbimet shëndetësore

Qytetarët e Mqedonisë janë shprehur të revoltuar nga kushtet në shëndetësi. Në një anketë për Alsat, disa nga qytetarët që prisnin para spitaleve thanë se detyrohen të presin me muaj të tërë për të caktuar termine për ndonjë nga klinikat e qytetit. Shumë prej qytetarëve vërejtje kanë edhe për higjienën dhe shërbimet shëndetësore, transmeton albinfo.ch.

“Shumë gjëra. Çfarë për shembull? Nuk ka higjienë. Shërbimi nuk është, nuk janë të mira”, tha një qytetar.

“Tash erdha, në ora 11 e kam të caktuar? Sa kohe keni pritur? Një muaj. A është shumë? Çfarë të bëjmë, ashtu është”, tha një qytetare.

“Ne jemi të kënaqur. Mirë kaluam”, u shpreh një qytetar.

Gjithashtu, një pjesë e qytetarëve ankohen edhe për mungesë të kuadrit shëndetësor. Ndërkohë, shumë të tjerë thonë se në klinikat e Shkupit më shumë ka të punësuar administratë partiake se punonjës shëndetësor.

“Gjithçka duhet të ndryshojë, nuk jemi të kënaqur. Mjekët po ikin jashtë vendit, disa mbeten, ata nuk janë fajtor, nuk ka kuadër”, tha një qytetar.

“Kaos është këtu. Askund në botë nuk ka më shumë administratë në numër kundrejt personelit shëndetësor, kjo është kaos. Janë punësuar njerëz partiak, nga njëra parti ose tjetra, nga të gjitha, pavarësisht se cila”, shtoi një qytetar.

Ministri i Shëndetësisë, Arben Taravari ka paralajmëruar ndryshime për terminët, pikërisht për shkak të ankesave të shumta të qytetarëve. Ditë më parë ai tha se po shqyrtohet mundësia e zgjerimit të programit “Termini im” ose eventualisht një dixhitalizim krejtësisht i ri. Gjithashtu, Taravari ka paralajmëruar përdorimin e telemjekësisë – konsulta nga distanca. Sipas tij, për disa çështje pacienti nuk duhet të vijë në klinikë, por mund të ketë një periudhë të caktuar kur mjeku të bëjë konsulta nga distanca. Nëse është e nevojshme, mjeku do ta thërrasë pacientin dhe do ta ekzaminojë fizikisht.

The post Qytetarët e Maqedonisë, të pakënaqur nga shërbimet shëndetësore appeared first on Albinfo.