Starmer: Rusia e nisi luftën në Ukrainë, ajo mund t’i japë fund menjëherë

Kryeministri britanik, Keir Starmer deklaroi se Rusia mund ta përfundojë menjëherë luftën në Ukrainë pasi ishte ajo që e nisi atë. Kjo deklaratë vjen pasi presidenti rus Vladimir Putin tha se nëse raketat perëndimore përdoreshin në territorin rus do të kishte një përshkallëzim serioz të luftës.

Putin i tha televizionit shtetëror rus se kjo “nuk do të thoshte asgjë tjetër përveç pjesëmarrjes së drejtpërdrejtë të vendeve të NATO-s – SHBA dhe vendeve evropiane – në luftën në Ukrainë”.

Starmer është në Uashington për bisedime me presidentin amerikan Joe Biden të premten, ndërsa aleatët e Kievit diskutojnë për t’i dhënë Ukrainës lejen për të gjuajtur raketat e tyre në objektivat brenda Rusisë.

I pyetur për përgjigjen e tij ndaj komenteve në fluturimin e tij për në Uashington, kryeministri britanik pati një ton të fortë në mënyrë të përsëritur duke deklaruar se Rusia e kishte filluar luftën.

“Rusia filloi këtë konflikt. Rusia pushtoi ilegalisht Ukrainën. Rusia mund ta përfundojë këtë konflikt menjëherë. Për të përsëritur, ishte Rusia ajo që e filloi këtë në radhë të parë. Ata e shkaktuan konfliktin, janë ata që veprojnë në mënyrë të paligjshme.”, u shpreh kryeministri britanik./abcnews.al