Tensionet në Lindjen e Mesme/ SHBA vendos avionë dhe anije luftarake në gatishmëri ndërsa Irani kërcënon Izraelin

Shtetet e Bashkuara do të vendosin anije luftarake dhe avionë luftarakë të tjerë në Lindjen e Mesme për të ndihmuar në mbrojtjen e Izraelit nga sulmet e mundshme nga Irani dhe përfaqësuesit e tij, tha Pentagoni.

Tensionet mbeten të larta në rajon lidhur me vrasjen e liderit të Hamasit Ismail Haniyeh në Iran dhe një komandant kyç të grupit militant libanez Hezbollah.

Forcat e mbrojtjes raketore janë vendosur në gatishmëri, tha Pentagoni, duke shtuar se angazhimi i tij për të mbrojtur Izraelin ishte “i hekurt”. Udhëheqësi i Iranit Ayatollah Khamenei është zotuar për “ndëshkim të ashpër” kundër Izraelit për vrasjen e Haniyeh dhe shpalli tri ditë zie kombëtare.

Udhëheqësi i Hamasit u vra në Teheran të mërkurën. Irani dhe përfaqësuesi i tij në Gaza fajësuan për sulmin Izraelin.

Haniyeh, 62 vjeç, konsiderohej gjerësisht lideri i përgjithshëm i Hamasit dhe luajti një rol kyç në negociatat që synonin arritjen e një armëpushimi në luftën e Gazës.

Vdekja e tij erdhi vetëm disa orë pasi Izraeli pretendoi se vrau Fuad Shukr, komandantin e lartë ushtarak të përfaqësuesit të Iranit në Liban, Hezbollahut.

Në një deklaratë, Pentagoni tha se dislokimet e do të “përmirësonin mbrojtjen e forcave të SHBA-së, do të rrisnin mbështetjen për mbrojtjen e Izraelit dhe do të siguronin që SHBA-ja të jetë e përgatitur për t’iu përgjigjur situatave të ndryshme”.

Ushtria amerikane kishte intensifikuar gjithashtu dislokimet përpara 13 prillit, kur Irani nisi një sulm ndaj Izraelit me dronë dhe raketa. Izraeli dhe aleatët e tij rrëzuan pothuajse të gjithë rreth 300 dronë dhe raketa që u hodhën.

Izraeli nuk ka komentuar drejtpërdrejt mbi sulmin që vrau Haniyeh.

Më herët, zëdhënësja e Pentagonit Sabrina Singh tha se SHBA nuk besonte se përshkallëzimi ishte i pashmangshëm.

Një delegacion izraelit do të udhëtojë në Kajro në ditët në vijim për negociata për të arritur një armëpushim në Gaza dhe marrëveshje për lirimin e pengjeve, tha Netanyahu të premten.

Hamasi nisi luftën me sulmin e tij të 7 tetorit në Izrael, ku mbetën të vrarë 1200 persona. Izraeli u përgjigj me një operacion ushtarak, duke vrarë pothuajse 40,000 njerëz.

/abcnews.al