Partitë politike kanë afat deri më 30 gusht të deklarojnë koalicionet

Subjektet politike deri të premten kanë afat t’i deklarojnë në Komisionin Qendror të Zgjedhjeve (KQZ), koalicionet parazgjedhore për votimet e fillim vitit të ri, tha zëdhënësi i KQZ-së, Valmir Elezi.

Ai ka deklaruar se pas 30 gushtit, secili subjekt politik që s’ka deklaruar koalicion do të obligohet të garojë i vetëm në zgjedhjet parlamentare të 9 shkurtit.

“Sipas ligjit për zgjedhjet e përgjithshme, partitë politike të cilat janë të regjistruara në KQZ dhe të cilat duan të marrin pjesë në zgjedhjet në shkurt të viti 2025 përmes koalicionit duhet ta njoftojnë KQZ, respektivisht Zyrën për regjistrim, certifikim dhe kontrollim financiar të subjekteve politike si duna të marrin pjesë në këto zgjedhje në këtë mënyre. Afati i fundit për të bërë këtë njoftim është data 30 gusht pra deri ne këtë kohë të gjitha partitë politike duhet të njoftojnë KQZ-në se në zgjedhjet e 9 shkurtit do të marrin pjesë përmes koalicionit”, ka thënë Elezi për EO.

Zëdhënësi i KQZ-së thotë se deri të hënën, nuk kanë pranuar asnjë koalicion.

“Koalicioni mund të ndërtohet nga së paku dy parti politike dhe partia politike nuk mund të tërhiqet nga koalicioni pasi të jete certifikuar derisa rezultati i zgjedhjeve të certifikohet nga ana e KQZ-së. Gjithashtu partia politike e cila është anëtare e koalicionit nuk mund të marrë pjesë si anëtare në një koalicion tjetër, pra të partive të tjera apo edhe si parti e veçanta në procesin zgjedhor. Deri në këto momente që flasim, në KQZ nuk kemi pranuar ndonjë njoftim nga ana e partive politike se do të kërkojnë certifikim në zgjedhje përmes koalicionit. Afati i fundit për të bërë këtë deklarimi është data 30 gusht”, ka thënë ai.

9 shkurti si datë e zgjedhjeve është caktuar nga presidentja e Kosovës, Vjosa Osmani, pas takimit me subjektet politike./Ekonomia Online

The post Partitë politike kanë afat deri më 30 gusht të deklarojnë koalicionet appeared first on Albinfo.