A mund të prisni të njëjtin nivel të kujdesit shëndetësor në të gjitha kantonet zvicerane?

Zvicra ka një sistem shëndetësor universal dhe me cilësi të lartë, por a është i njëjtë në gjithë vendin?

Në përgjithësi, shumica e popullsisë së Zvicrës është e kënaqur me kujdesin shëndetësor që marrin (d.m.th., cilësinë e kujdesit, jo koston).

Kjo është ajo që del nga studime të ndryshme të kryera brenda dhe jashtë vendit – kur krahasohet me vendet e tjera – duke përfshirë një sondazh të vitit 2023 nga Fondi i Commonwealth-it.

Por, a do të thotë kjo se kujdesi mjekësor është i të njëjtit cilësi në gjithë vendin?

E po, përgjigjja themelore nuk është domosdoshmërisht.

Kantonet vendosin

Në një shtet federalist si Zvicra, kantonet kanë një shkallë të lartë autonomie në një gamë të gjerë çështjesh, duke përfshirë infrastrukturën shëndetësore (që është edhe arsyeja pse primet e sigurimit shëndetësor ndryshojnë nga një kanton në tjetrin), transmeton albinfo.ch.

Shembulli më i fundit i kësaj strukture ‘të pabarabartë’ janë pabarazitë ndërmjet kantoneve në depistimin e kancerit të gjirit.

Sipas një studimi të fundit nga Qendra Universitare për Mjekësinë e Përgjithshme dhe Shëndetin Publik (Unisanté) në Lozanë, 14 kantone ftojnë të gjitha gratë e moshës 50 deri në 69 vjeç (deri në 74 në nëntë prej tyre) për ekzaminim mamografik çdo dy vjet, ndërsa kantonet e tjera nuk kanë një program zyrtar për zbulimin e kancerit, kështu që i takon mjekut të vendosë nëse një ekzaminim i tillë është i nevojshëm për një pacient të caktuar.

Prandaj, niveli i kujdesit shëndetësor që i ofrohet popullatës varet kryesisht nga politikat, financimi dhe infrastruktura shëndetësore e secilit kanton.

Çfarë do të thotë saktësisht kjo?

Le të shohim pikën e fundit – infrastrukturën e kujdesit shëndetësor – që është, shërbimet, objektet dhe profesionistët në dispozicion të popullatës.

Është logjike që qytetet e mëdha të kenë një infrastrukturë më të mirë shëndetësore sesa qytetet e vogla dhe aq më tepër zonat rurale apo malore, shkruan thelocal.

Për shembull, vetëm pesë kantone kanë spitale universitare – Gjenevë, Vaud, Cyrih, Bazel dhe Bernë – që do të thotë se popullatat e atyre kantoneve kanë automatikisht qasje në teknologjinë më të fundit dhe shërbimet mjekësore.

Kjo nuk do të thotë domosdoshmërisht që njerëzit që jetojnë në kantone të tjera nuk mund të përfitojnë nga kujdesi i mirë mjekësor në spitalet kantonale, komunale ose rrethore në territoret e tyre.

Por të kesh qasje në një spital publik të bazuar në mësimdhënie dhe kërkime, sigurisht që u jep banorëve të këtyre pesë kantoneve një avantazh për sa i përket cilësisë së kujdesit shëndetësor që ata marrin.

Për shkak të numrit të mjekëve që po dalin në pension dhe faktit që nuk po trajnohen mjaft të rinj për të përmbushur nevojat e popullsisë në rritje, shumë zona të vendit po vuajnë nga mungesa e mjekëve të përgjithshëm – kryesisht komunitetet e vogla dhe zonat rurale.

Kjo mungesë shtrihet edhe tek mjekët pediatër.

Sipas Shoqatës Zvicerane të Pediatërve, mungesa “ndryshon shumë nga rajoni në rajon”.

Por ajo që është e qartë, sipas presidentit të shoqatës, Marc Sidler, është se pa disponueshmërinë e mjekëve pediatër ose të mjekëve të familjes, “fëmijët në zonat rurale nuk do të mund të merrnin më kujdesin e duhur”.

A mund të udhëtoni në një kanton zviceran të pajisur më mirë për trajtim mjekësor?

Në shumicën e rasteve, jo.

Kjo për shkak se sigurimi juaj bazë shëndetësor (KVG / LaMal) do të paguajë vetëm për trajtimin (si ambulator, ashtu edhe brenda spitalit) në kantonin ku jetoni.

Arsyeja është se çdo kanton vendos primet e veta të kujdesit shëndetësor, disa prej të cilave janë më të larta se të tjerët, kështu që nëse jetoni në një kanton “më të lirë” dhe dëshironi të trajtoheni në një kanton më të shtrenjtë, ofruesit tuaj mund të mos i pëlqejë.

Megjithatë, ky rregull zbatohet vetëm për situatat jo urgjente; rastet emergjente trajtohen ndryshe.

“Në rast urgjence, ju mund të shkoni në çdo spital në Zvicër”, sipas Zyrës Federale të Shëndetit Publik (FOPH).

Megjithatë, kjo duhet të jetë një institucion publik i autorizuar shëndetësor, e jo një klinikë private, e cila në parim nuk mbulohet nga sigurimi bazë.

FOPH e përkufizon ‘urgjencën’ si një situatë kur “gjendja juaj shëndetësore nuk ju lejon të dërgoheni në një spital në kantonin ku jetoni. Ju do të transferoheni në një spital në kantonin ku jetoni sa më shpejt që kjo të jetë e mundur dhe e arsyeshme”.

FOPH gjithashtu lejon trajtimin jashtë kantonit për “arsye të veçanta mjekësore” – domethënë, nëse kujdesi i kërkuar nuk mund të ofrohet në një institucion publik të kujdesit shëndetësor në kantonin tuaj të vendbanimit.

Megjithatë, nëse keni një sigurim shtesë, ai mund t’ju mbulojë për trajtime mjekësore jashtë kantonit.

The post A mund të prisni të njëjtin nivel të kujdesit shëndetësor në të gjitha kantonet zvicerane? appeared first on Albinfo.