Karabinierët i vazhdojnë “stërvitjet” edhe sot mbi Urën e Ibrit, portalet lokale publikojnë fotografi

Karabinierët edhe sot i kanë vazhduar “stërvitjet” mbi Urën e Ibrit, që ndan Mitrovicën e Jugut me atë të Veriut.

Pamjet nga këto stërvitje i kanë publikuar mediat lokale atje.

Prej dje mjetet shtesë që i përkasin Njësisë së Specializuar Shumëkombëshe të KFOR-it (NJMS) janë vendosur përkohësisht në urën kryesore mbi lumin Ibër, në Mitrovicë.

Kjo u bë e ditur nga KFOR’i në një përgjigje për Express, të cilët thanë se dislokime të tilla shtesë, janë pjesë e trajnimit periodik që KFOR-i kryen për të testuar procedurat e tij të vjetra dhe për të mbrojtur standardet më të larta operacionale.

“KFOR-i gjithashtu mban një prani fikse në urën kryesore mbi lumin Ibër/Ibër, në Mitrovicë dhe vazhdon të kryejë patrullime të rregullta në zonat përreth. KFOR-i po monitoron situatën e sigurisë në veri të Kosovës dhe mbetet vigjilent. Është e vendosur të marrë të gjitha masat e nevojshme për të vazhduar përmbushjen e mandatit të saj të OKB-së dhe për t’iu përgjigjur çdo zhvillimi të mëtejshëm përkatës”, thuhet në përgjigjen e tyre.

Tutje, theksojnë se “misioni i KFOR-it i udhëhequr nga NATO ripohon përkushtimin e tij të palëkundur për të kontribuar në një mjedis të sigurt për të gjithë njerëzit dhe komunitetet që jetojnë në Kosovë, në çdo kohë dhe në mënyrë të paanshme, nën mandatin e tij të OKB-së”.

“KFOR-i vepron si reaguesi i tretë i sigurisë dhe vazhdon të koordinohet ngushtë me të gjithë homologët e tij, duke përfshirë Policinë e Kosovës dhe misionin e BE-së për Sundimin e Ligjit (EULEX), respektivisht si reagues i parë dhe i dytë i sigurisë”.