Laureati i Nobelit, Muhammed Yunus zgjidhet kryeministër i përkohshëm i Bangladeshit

Fituesi i Çmimit Nobel për Paqe, Muhammad Yunus do të kryesojë qeverinë e përkohshme të Bangladeshit pasi kryeministrja Sheikh Hasina dha dorëheqjen dhe u largua jashtë vendit mes trazirave të dhunshme kundër qeverisë së saj.

I njohur si “bankieri për më të varfërit” dhe një kritik i gjatë i Hasinës, Yunus do të shërbejë si kryeministër i përkohshëm deri në mbajtjen e zgjedhjeve të reja. Vendimi për emërimin e Yunus u mor në një takim ku morën pjesë drejtues të protestës studentore, shefa ushtarakë, anëtarë të shoqërisë civile dhe drejtues biznesi.

Hasina u largua nga Bangladeshi të hënën pas 15 vitesh në pushtet mes protestave kundër një sistemi kuotash për ndarjen e vendeve të punës në qeveri.

Ushtria ka marrë përkohësisht kontrollin, por ende nuk dihet se cili do të jetë roli i saj në qeverinë kalimtare pasi presidenti shpërndau parlamentin sot për t’i hapur rrugën zgjedhjeve, raporton AP.

Drejtuesit e studentëve që organizuan protestat kërkuan që Yunus, i cili aktualisht ndodhet në Paris si këshilltar i organizatorëve të Olimpiadës, të drejtojë qeverinë e përkohshme.

Një ekonomist dhe bankier me profesion, Yunus mori Çmimin Nobel për Paqe në vitin 2006 për përdorimin e mikrokredive për të ndihmuar njerëzit më të varfër, veçanërisht gratë./abcnews.al