RMV, pesë zjarre aktive, Angellov u bën thirrje qytetarëve të jenë shumë të kujdesshëm
Në 24 orët e fundit në të gjithë vendin në hapësirë të hapur janë shënuar 37 vatra, prej të cilave 29 janë shuar, tre janë vënë nën kontroll dhe pesë janë ende aktive, njofton Qendra për Menaxhimin e Krizave (QMK), transmeton Portalb.mk. Zjarre aktive ka në komunën e Studeniçanit, mbi fshatin Cërvena Vodë, te lokaliteti […]
Në 24 orët e fundit në të gjithë vendin në hapësirë të hapur janë shënuar 37 vatra, prej të cilave 29 janë shuar, tre janë vënë nën kontroll dhe pesë janë ende aktive, njofton Qendra për Menaxhimin e Krizave (QMK), transmeton Portalb.mk.
Zjarre aktive ka në komunën e Studeniçanit, mbi fshatin Cërvena Vodë, te lokaliteti i quajtur Kërsta, në komunën e Shtipit, në afërsi të lokalitetit të quajtur Jamularci, afër Penushit dhe në terrenin ushtarak Krivolak, në komunën e Dibrës afër fshatrave Tatar Elevci dhe afër Mogorces. Në komunën e Çashkës zjarri është aktiv në drejtim të fshatit Stepanci dhe lokalitetit të quajtur Kadiicë, në kufirin ndërmjet Komunës së Çashkës dhe Komunës së Dollnenit, ku digjet një pyll i përzier.
Siç njofton QMK, reshjet e shiut kanë shuar zjarrin në Komunën e Çashkës, në malin e Mukosit, në atarin e fshatit Omorani, ndërsa zjarri është nën kontroll në malin e Galiçicës, vendi i quajtur Zli Dol, në territor të Komunës së Ohrit, ku po digjen trungje nga zjarri i paraprak. Zjarri në anën e Resnjës është shuar nga reshjet e shiut. Zjarri është nën kontroll në Komunën e Zhelinës, afër fshatit Merovë dhe në Komunën e Novës, ku po digjet deponia.
Katër zjarre janë shuar në komunën e Prilepit, dy në komunën e Jegunovcit, në komunat Kërçovë, Tearcë, Novosellë, Veles. Dy zjarre janë shuar në komunat Gostivar, Qendër Zhupë, Butel, Saraj, Çuçer Sandevë, Petrovec.
Drejtori i QMK-së, Stojançe Angellov, theksoi se gjendja me zjarre në hapësira të hapura po përkeqësohet sërish. Ai u ka bërë thirrje qytetarëve që të jenë jashtëzakonisht të kujdesshëm për të mos shkaktuar zjarr.
“Nëse vërejnë sjellje të dyshimta, kërkoj që menjëherë të lajmërohen në 112 ose te ndonjë shok, i njohur i cili do t’ia përcjellë informacionin MPB-së”, tha Angellov.
Për shkak të zjarreve në mes të korrikut, Qeveria e Maqedonisë së Veriut për herë të parë shpalli gjendje krize për 30 ditë, e cila u vazhduar përsëri më 13 gusht dhe kërkoi ndihmë përmes mekanizmit të BE-së në fushën e mbrojtjes civile.
Gjithashtu, është vënë ndalesë e plotë e lëvizjes në pyje dhe toka pyjore në territorin e menaxhuar nga NP “Pyjet Kombëtare”, i cili do të zgjasë deri në ditën e shfuqizimit të tij, në periudhën nga ora 06:00 deri në orën 20:00.