SHBA/ 10,000 punonjës hotelesh në grevë, thirrje për rritje të pagave

Rreth 10,000 punonjës hotelesh kanë dalë në grevë në disa qytete të SHBA-së për të kërkuar rritje të pagave. Sipas sindikatës Unite Here , rreth 10,016 anëtarë të saj morën pjesë në grevë në 25 objektet e gjigantëve të hoteleve Hilton, Hyatt dhe Marriott .

Pjesëmarrja më e madhe e punonjësve të hoteleve në grevë u regjistrua në hotelet në Boston, San Francisko dhe Honolulu, sipas Unite Here, ndërsa punonjësit e hoteleve në katër qytete të tjera po mendojnë t’i bashkohen grevës.

Grevat pritet të zgjasin dy deri në tre ditë.

Sipas Unite Here, industria e hotelerisë ka “përfituar” nga pandemia Covid-19 për të reduktuar fuqinë punëtore, pa e rimbushur plotësisht atë pas heqjes së kufizimeve shëndetësore.

Anëtarët e sindikatës pohojnë gjithashtu se pagat e tyre shpesh nuk i lejojnë më të mbulojnë shpenzimet e tyre aktuale dhe se shumë janë të detyruar të bëjnë punë të dyta për të përballuar jetesën.

Në të njëjtën kohë, theksojnë ata, industria e hotelerisë është rikuperuar plotësisht nga kriza Covid-19.

/abcnews.al