SWISS zgjat pezullimet e fluturimeve në Lindjen e Mesme

Swiss International Air Lines (SWISS) ka zgjatur pezullimin e fluturimeve drejt dhe nga Tel Avivi, Izraeli dhe Bejruti e Libani, deri më 26 gusht, për shkak të tensioneve aktuale në Lindjen e Mesme.

Hapësira ajrore mbi Iranin, Irakun dhe Izraelin gjithashtu nuk do të përdoret deri më 26 gusht, sipas një deklarate të publikuar të hënën nga dega zvicerane e linjës ajrore gjermane Lufthansa.

“Na vjen keq thellësisht për çdo shqetësim që mund t’u shkaktojë pasagjerëve tanë, por siguria e pasagjerëve dhe ekuipazhit tonë mbetet gjithmonë prioriteti ynë kryesor”, tha SWISS. Pasagjerët e prekur do të kontaktohen drejtpërdrejt, raporton swissinfo.

Linja ajrore ofron “mundësinë e shtyrjes së udhëtimit për një datë të mëvonshme pa kosto ose marrjen e një rimbursimi të plotë të biletës”.

SWISS thotë se po vazhdon të monitorojë nga afër situatën në Lindjen e Mesme dhe mbetet në kontakt të vazhdueshëm me autoritetet përkatëse në Zvicër dhe në terren, transmeton albinfo.ch.

Grupi Lufthansa pezulloi fluturimet e tij për në Bejrut në fund të korrikut pas një sulmi vdekjeprurës me raketa në komunitetin Druz të Madjdal Shams në lartësitë Golan, të aneksuar nga Izraeli, i cili fajësoi Hezbollahun për sulmin.

The post SWISS zgjat pezullimet e fluturimeve në Lindjen e Mesme appeared first on Albinfo.