Zvarritet hapja e shkollës së re në Vizbeg, nuk ka mësimdhënës 

Objekti është gati, por mësimi në shkollën e re të Vizbegut nuk po fillon. Për shkak se ende nuk janë punësuar mësimdhënësit, nxënësit e Vizbegut po detyrohen të mësojnë në shkolla të lagjeve tjera.

Ditën e parë të vitit të ri shkollor drejtori i kësaj shkolle Kadri Elezi për TV21 tha se ministria e Arsimit dhe komuna e Butelit shumë shpejtë do të hapin konkursin për pranimin e kuadrove të reja.

“Janë marrë vesh në mënyrë të përshpejtuar të kryejnë procedurën e marrjes së pëlqimeve, dhe pas marrjes të hapin konkurs për pranimin e kuadrove të reja dhe më pas të zhvillohet mësimi normal nga klasa e parë deri në klasën e pestë. Banorët e lagjes së Vizbegut është e vërtetë se kanë pritur një kohë të gjatë për shkollën por do të presin edhe disa ditë derisa oficialisht të nisë mësimi…”, tha për TV21 Kadri Elezi – drejtor i SH.F “Vizbeg”.

Nga ana tjetër kryetari i Butelit Darko Kostovski, premton se problemi do të zgjidhet së shpejti, dhe për këtë presin nga Ministria e Arsimit dhe Shkencës……

“Presim nga MASH, do të bëhet së shpejti. 13 mësimdhënës për fillim dhe 10 për për shërbimet”, potencoi Darko Kostovski – kryetar i Komunës së Butelit.

Derisa drejtori i shkollës dhe kryetari i komunës presin pëlqimin e MASH për punësimet, ministrja Vesna Janevska, thotë se ata duhet vet të organizohen.

“Ajo është punë e komunës jo e ministrisë, ministria nuk ka asnjë lidhje. E gjithë ajo është punë e vetëqeverisjes lokale, ju e dini që shkollat fillore janë në vetëqeverisjen lokale, se si ata do të organizohen ata e dinë se si duhet ta bëjnë dhe unë jam e bindur se do ta bëjnë.
E njëjta vlen edhe për shkollën në Vizbeg?
-po, absolutisht vlen për të gjitha vetëqeverisjet lokale”,u shpreh ministrja e Arsimit dhe Shkencës, Vesna Janevska.

Derisa institucionet po e hedhin “topin” të njëra tjetra, nxënësit enden nuk e dinë se kur do të nisin të ndjekin mësimin në shkollën e re të Vizbegut.

The post Zvarritet hapja e shkollës së re në Vizbeg, nuk ka mësimdhënës  appeared first on Flaka, në çdo lajm... .