BE-ja reagon pas mbylljes së postës së Serbisë në veri, e quan hap të njëanshëm dhe të pakoordinuar

Bashkimi Evropian ka reaguar për mbylljen e mbylljen e 9 degëve të Postës së Serbisë në veri të Kosovës. Përmes një deklarate, BE-ja e konsideron këtë një hap të njëanshëm dhe të pakoordinuar, i cili shkel marrëveshjet e arritura në kuadër të Dialogut të lehtësuar nga BE-ja.

“Si pjesë e Marrëveshjeve në lidhje me Telekomunikacionet e arritura në vitin 2013 dhe Planit të Veprimit të rënë dakord më 2015, të dyja palët ranë dakord të diskutojnë shërbimet postare “në një fazë të mëvonshme”, duke pranuar kështu se çështja mund të trajtohet vetëm brenda kornizës së Dialogut. Këtë e ka pranuar sërish sot Autoriteti Rregullativ i Shërbimeve Elektronike dhe Postare të Kosovës”, thuhet në deklaratën e BE-së.

BE-ja shpreh gatishmërinë ta përfshijë këtë çështje në agjendën e takimit të ardhshëm të Dialogut dhe pret që palët të zhvillojnë ide konstruktive që mund të shërbejnë si bazë për zgjidhje.

Sipas BE-së, mbyllja e shërbimeve ekzistuese të serbëve të Kosovës, pa marrëveshje të dakordësuar paraprakisht, do të ndikojë negativisht në jetën e përditshme dhe kushtet e jetesës së komunitetit serb.

“Veprimet e njëanshme dhe të pakoordinuara nuk mund të ofrojnë zgjidhje për këtë apo ndonjë çështje tjetër që i përket procesit të normalizimit ndërmjet Kosovës dhe Serbisë. Mbyllja e shërbimeve ekzistuese të serbëve të Kosovës, pa ndonjë marrëveshje të re të rënë dakord paraprakisht, do të ndikojë negativisht në jetën e përditshme dhe kushtet e jetesës së këtij komuniteti”, thuhet më tej në deklaratë.

BE-ja i bën “thirrje qeverisë së Kosovës që të rishqyrtojë vendimin e saj dhe të gjejë një zgjidhje të negociuar për këtë çështje në kuadër të Dialogut të lehtësuar nga BE-ja.

The post BE-ja reagon pas mbylljes së postës së Serbisë në veri, e quan hap të njëanshëm dhe të pakoordinuar appeared first on Albinfo.