Cili është vendi më i mirë për të bërë pushime me familje

Spanja, Franca dhe Portugalia janë lënë pas nga Italia, kjo perlë mesdhetare e cilësuar si vendi më i mirë në Evropë për pushime familjare për britanikët këtë verë.

Italia është shpallur vendi më i mirë për të udhëtuar me fëmijët nga media e njohur Telegraph.

Shumë hotele kanë dhoma të projektuara posaçërisht për familjet me fëmijë të vegjël, si dhe hapësira me lojëra dhe klube aktivitetesh për fëmijët, për prindërit që kanë nevojë për pushim.

Italia është gjithashtu shtëpia e shumë agroturizmeve (qëndrime në ferma), ku familjet mund të shijojnë jetën italiane duke gatuar me nonna-t (gjyshet në gjuhën italiane) në kuzhinë dhe duke ndihmuar në ullishtet.

The Telegraph sugjeroi Sestri Levante, Laggo Maggiore dhe Forte Village në Sardenjë për familjet me fëmijë nën pesë vjeç; Kalabria, Torino, Pulia dhe agriturismet në Toskanë, për fëmijët e moshës pesë deri në tetë vjeç; dhe udhëtime përgjatë bregut të Amalfit, Toskanës dhe luginës Venosta për fëmijët më të rritur, shkruan shqip.al, transmeton albinfo.ch.

Megjithatë, duhet të merret parasysh se Italia mund të jetë pak më e shtrenjtë se Spanja ose Portugalia, edhe kur merren parasysh qytete të mëdha si Roma dhe Madridi, sipas Explore Worldwide.

Për të pushuar me mot të mirë, vizitorëve u rekomandohet të shkojnë midis prillit dhe qershorit, ose shtatorit dhe tetorit.

Lonely Planet thotë se Italia është “shtëpia e shumë prej veprave më të mëdha të artit, arkitekturës dhe gastronomisë”, duke shtuar se ajo “ngazëllen, frymëzon dhe emocionon vizitorët si askush tjetër”.

Është vendi me më shumë vende të Trashëgimisë Botërore të UNESCO-s, si bazilika e Shën Pjetrit, Panteoni, Koloseu, kulla e pjerrët e Pizës, Kanali i Madh i Venecias dhe Liqeni i Komos.

The post Cili është vendi më i mirë për të bërë pushime me familje appeared first on Albinfo.