Deklaratat rreth rastit Dehari, Kurteshi thotë se u ftua për intervistim nga Prokuroria Speciale

Anëtari i Lëvizjes Vetëvendosje, Sami Kurteshi,  ka thënë se është ftuar nga Drejtoria për Hetimin e Krimit të Organizuar dhe Krimeve të Rënda për marrje në pyetje në lidhje me deklaratat për rastin “Dehari”.

“Më 16 gusht 2024, me autorizimin e prokurorit special Bekim Kodraliu, kam pranuar thirrje nga Drejtoria për Hetimin e Krimit të Organizuar dhe Krimeve të Rënda për marrje në pyetje më datë 20 gusht 2024, në lidhje me deklaratat e bëra në konferencën për media me rastin e pensionimit të Afrim Shefkiut, i ngarkuar me rastin e Astrit Deharit, të mbajtur para Prokurorisë Speciale”.

“Pas marrjes në pyetje të ministres së Drejtësisë Albulena Haxhiu nga Prokuroria Speciale si dëshmitare për rastin, pas deklarimit publik në rrjetet sociale, në lidhje me rastin ‘A. Dehari’, po për deklarimin publik në konferencë për media për rastin ‘Dehari’, më thirr për marrje në pyetje edhe mua!”.

Ai ka thënë se kjo “sjellje” e Prokurorisë zgjon pyetjet se “a po rifillon hetimi i njëmendtë i rastit” ose “po bëhen përpjekje e njëmendtë për humbjen e gjurmëve të vrasjes së Astritit”.

“Kjo sjellje e Prokurorisë në thelb nxjerr dy pyetje thelbore:

– A po rifillon hetimi i njëmendtë i rastit ‘A. Dehari’ nga Prokuroria Speciale?

– Apo po bëhet përpjekje e njëmendtë për humbje të gjurmëve të vrasjes së Astritit?”.

Ai ka thënë se koha po vonon, por e drejta nuk shuhet.

“Sidoqoftë, #DrejtësiapërAstritin do të arrijë! Koha vonon, por e drejta nuk shuhet! E drejta domosdo del në shesh!”.

Ai publikoi ftesën.