Muzika e Linda Rukajt përplotëson festivalin “Kino Kosova” në Bernë

Kantautorja e njohur shqiptare Linda Rukaj, së bashku me kuartetin e saj të përbërë nga Armend Xhaferi, Enes Bajramliqi, dhe Enver Muhamed, performuan më 13 shtator 2024 në Festivalin e Filmit “Kino Kosova” në Bernë. Ky koncert ishte pjesë e këtij festivali që ka për qëllim promovimin e artit dhe kulturës shqiptare në Zvicër, duke ofruar një platformë për artistët shqiptarë të shpalosin talentin dhe trashëgiminë e tyre kulturore.

Linda Rukaj është një artiste shumëdimensionale nga Kavaja, e njohur për praninë e saj cilësore në muzikën shqiptare dhe atë ndërkombëtare. Ajo është këngëtare, kompozitore dhe multiinstrumentaliste, me një karrierë që ka marrë hov në vitin 2011 me publikimin e albumit të saj të parë solo të titulluar “Jam”, një projekt që ajo e kompozoi dhe e ilustroi vetë. Albumi u mirëprit dhe shënoi fillimin e një rruge të suksesshme muzikore. Po atë vit, Linda u zhvendos në Paris për të vazhduar studimet në kitarën xhaz dhe kontrabas, duke u bërë kontrabasistja e parë femër e xhazit në Shqipëri – një arritje që theu barrierat gjinore në muzikën shqiptare.

Gjatë karrierës së saj, Linda ka performuar në festivale ndërkombëtare të ndryshme dhe ka qenë prezente rregullisht në disa nga sallat më të njohura të koncerteve në Paris. Muzika e saj është një përzierje e jashtëzakonshme e kompozimeve origjinale me elemente të muzikës tradicionale shqiptare, xhazit brazilian, sambës, bossa novës, si dhe këngë të ndryshme nga repertore globale. Ajo është një multiinstrumentaliste e talentuar, që luan kitarë, kontrabas, kalimbë dhe një sërë instrumentesh tradicionale shqiptare, përfshirë llahutën, çiftelinë dhe defin. Që nga viti 2020, Linda bashkëpunon me teatrin e njohur të qytetit të Parisit, duke sjellë krijimtarinë e saj unike në skenën artistike franceze.

Performanca e Lindës në Qendrën Kulturore PROGR në Bernë u mirëprit ngrohtësisht nga publiku i pranishëm, i cili vlerësoi veçanërisht repertorin e saj të pasur muzikor. Ajo solli një kombinim të veprave të saj më të njohura dhe atmosferës së veçantë të festivalit, duke përfshirë këngë të dashura si: “Fustanin që ta solla mbrëmë”, “Shëngjergjat”, “Këndo Qyqe”, “Qerraxhi”, “S’paske pas një pikë mëshire”, “Dashuro”, “O vendi im”, dhe “Trëndafilia ime”. Secila prej këtyre këngëve përfaqëson një pjesë të identitetit artistik të Lindës, duke bashkuar nostalgjinë shqiptare me tingujt modernë dhe inovativë të saj.

Ky event ishte një mundësi e shkëlqyer për adhuruesit e muzikës dhe filmit që të shijojnë artin në një ambient të frymëzuar nga diaspora shqiptare dhe të mbështesin artistët që vazhdojnë të kontribuojnë në pasurimin e kulturës shqiptare jashtë kufijve. Linda Rukaj, përmes muzikës së saj, jo vetëm që prezanton një ndjeshmëri të thellë artistike, por gjithashtu sjell një zë të fuqishëm për diasporën shqiptare, duke u lidhur me rrënjët dhe kulturën kombëtare përmes artit të saj.

Luljeta Ademi

© 2024 ALBINFO.CH/RROMIR IMAMI

VIDEO:

The post Muzika e Linda Rukajt përplotëson festivalin “Kino Kosova” në Bernë appeared first on Albinfo.