Këshilli Rinor Kombëtar i RMV-së mati përfshirjen e të rinjve në të gjitha komunat

Këshilli Rinor Kombëtar i Maqedonisë (KRKM) publikoi analizën me titull “Indeks për përfshirje sociale të të rinjve në nivel lokal 2023 – 2024”. Analiza rendit komunat sipas performancës së tyre në drejtim të mbështetjes së përfshirjes dhe barazisë së të rinjve. Sipas KRKM-së, kjo renditje shërben si një mjet për të identifikuar fushat që kërkojnë përmirësim dhe për të nxjerrë në pah praktikat e suksesshme që mund të përsëriten në komunat e tjera, transmeton Portalb.mk.

Vlerësimi mesatar i përfshirjes sociale të të rinjve në nivel lokal është 41 përqind, ku Komuna e Ohrit renditet më e larta në mesin e të gjitha komunave. Komunat e Ohrit, Gostivarit, Kriva Pallankës, Strumicës dhe Gjevgjelisë janë cilësuar si komuna miqësore.

Për më tepër, sa i përket qasjes në shërbime, 40 përqind e komunave janë vlerësuar si “të mira apo të shkëlqyera” dhe 31 përqind e komunave janë “të shkëlqyera” për sa i përket qasjes në informacion.

Megjithatë, vetëm 16 përqind e komunave kanë një këshill rinor funksional. Gjithashtu, vetëm 4 përqind e komunave, përkatësisht Ohrit, Zelenikovës dhe Tetovës, janë vlerësuar si “të shkëlqyera” në përfshirjen e të rinjve në politikat publike.

“Analiza e pjesëmarrjes së të rinjve në nivel lokal tregon sfida të theksuara në përmbushjen e detyrimeve ligjore nga Ligji për Pjesëmarrjen Rinore dhe Politikat Rinore, si dhe në zbatimin e masave të parapara me Strategjinë Kombëtare për Rininë. Përkundër afateve të përcaktuara, shumë komuna i përmbushin këto obligime vetëm pjesërisht ose aspak”, thonë nga KRKM.

Analiza arrin në përfundimin se përfshirja thelbësore e të rinjve në krijimin e politikave publike është e rrallë. Të rinjtë rrallëherë synohen si grup i synuar, dhe kur ata janë më së shumti në formën e mbështetjes për klubet sportive, bursave për të rinj dhe llojeve të ngjashme të financimit dhe mbështetjes për të rinjtë.

Si masa për përmirësim, analiza rekomandon “caktimin e zyrtarëve rinorë me fokus të veçantë në çështjet rinore, zhvillimin e mjeteve inovative për pjesëmarrjen e të rinjve dhe përmirësimin e qasjes në mjetet ekzistuese për pjesëmarrje qytetare”.

Gjithashtu, komunat duhet të përmbushin detyrimin e tyre për të ndarë 0.1 përqind në buxhetin e tyre për çështjet rinore. Duhet të futen mjete digjitale më të qasshme dhe duhet përmirësuar komunikimi me organizatat e shoqërisë civile.