Masat ndëshkuese ndaj Kosovës, BE: Diskutimet e shteteve anëtare për raportin e Borrell janë duke vazhduar
Bashkimi Evropian po i vazhdon diskutimet për raportin e Kryediplomatit Josep Borrell për heqjen ose jo të masave ndëshkuese ndaj Kosovës, të vëna vitin e kaluar. Zëdhënësi i BE’së, Peter Stano, ka deklaruar se BE’ja dhe shtetet e saj anëtare vazhdojnë t’i kërkojnë Kosovës që të përmbahet nga “hapat e njëanshëm dhe të pakoordinuar”. “Diskutimet […]
![Masat ndëshkuese ndaj Kosovës, BE: Diskutimet e shteteve anëtare për raportin e Borrell janë duke vazhduar](https://orainfo.net/wp-content/uploads/2024/08/669602-masat-ndeshkuese-ndaj-kosoves-be-diskutimet-e-shteteve-anetare-per-raportin-e-borrell-jane-duke-vazhduar.jpg)
![masat-ndeshkuese-ndaj-kosoves,-be:-diskutimet-e-shteteve-anetare-per-raportin-e-borrell-jane-duke-vazhduar](https://orainfo.net/wp-content/uploads/2024/08/669602-masat-ndeshkuese-ndaj-kosoves-be-diskutimet-e-shteteve-anetare-per-raportin-e-borrell-jane-duke-vazhduar-1024x490.jpg)
Bashkimi Evropian po i vazhdon diskutimet për raportin e Kryediplomatit Josep Borrell për heqjen ose jo të masave ndëshkuese ndaj Kosovës, të vëna vitin e kaluar.
Zëdhënësi i BE’së, Peter Stano, ka deklaruar se BE’ja dhe shtetet e saj anëtare vazhdojnë t’i kërkojnë Kosovës që të përmbahet nga “hapat e njëanshëm dhe të pakoordinuar”.
“Diskutimet e shteteve anëtare të BE-së në Këshill për raportin e përfaqësuesit të lartë, për përmbushjen e kërkesave të BE-së nga Kosova janë duke vazhduar. Ato janë të brendshme dhe konfidenciale. BE-ja dhe shtetet e saj anëtare vazhdojnë t’u kërkojnë autoriteteve të Kosovës që të përmbahen nga hapat e njëanshëm dhe të pakoordinuar që mund të rrisin më tej tensionet, dhe ne presim që Kosova të adresojë dhe zgjidhë çështjet e hapura në Dialogun e lehtësuar nga BE-ja”, ka deklaruar Stano për RTV21.
Në fillim të këtij muaji, Stano kishte paralajmëruar se këto masa mund të ashpërsohen. Deklarata e tij kishte ardhur pas mbylljes se degëve të Postës së Serbisë në veri dhe planit të Qeverisë për hapjen e urës së Ibrit për qarkullimin e veturave.
“Në vend të hapave që do të çonin në uljen e tensioneve, janë ndërmarrë shumë e më shumë hapa dhe vendime të njëanshme që çojnë drejt përshkallëzimit. Atëbotë thamë që masat janë progresive, ato mund të ashpërsohen apo lehtësohen varësisht nga zhvillimi i situatës. Kjo pjesë prek pjesën e parë të pyetjes, se çfarë do të bëjmë [pas vendimeve të fundit të autoriteteve në Kosovë]. Pra, kemi masa në fuqi dhe këto masa mund të ashpërsohen nëse për një gjë të tillë pajtohen të gjithë akterët e BE-së”, tha Stano.
Cilat janë masat e BE-së ndaj Kosovës?
Masat e BE-së ndaj Kosovës përfshinin: suspendimin e përkohshëm të grupeve punuese për Marrëveshjen e Stabilizim-Asociimit, mosftesën e Kosovës në takime të nivelit të lartë dhe suspendimin e vizitave bilaterale.
Gjithashtu, u suspendua edhe programimi i fondeve për Kosovën, të cilat ishin paraparë të dorëzoheshin përmes Kornizës së Investimeve në Ballkanin Perëndimor dhe IPA 2024 (Instrumentet e Para-Anëtarësimit).