Mickoski: Ne si popull kemi bërë gjithçka, tani Evropa duhet të bëjë diçka për ne
Kryeministri i Maqedonisë së Veriut, Hristijan Mickoski, në një intervistë për Al Xhezira, duke biseduar për përfshirjen e bullgarëve në Kushtetutë, theksoi se qëndrimi i Qeverisë për këtë çështje është i qartë dhe i pandryshuar dhe se në këtë drejtim duhet të jepet përgjigje në dy pyetje, gjegjësisht cila është arsyeja e përfshirjes së bullgarëve […]
Kryeministri i Maqedonisë së Veriut, Hristijan Mickoski, në një intervistë për Al Xhezira, duke biseduar për përfshirjen e bullgarëve në Kushtetutë, theksoi se qëndrimi i Qeverisë për këtë çështje është i qartë dhe i pandryshuar dhe se në këtë drejtim duhet të jepet përgjigje në dy pyetje, gjegjësisht cila është arsyeja e përfshirjes së bullgarëve në Kushtetutë dhe çfarë fitojmë ne si shtet nga kjo, transmeton Portalb.mk.
“Këtu pyetja e parë ka një nënpyetje. Ne themi, në rregull, ja nëse të drejtat e njeriut janë të ndaluara apo të kufizuara sepse nuk janë pjesë e Preambulës së Kushtetutës sonë maqedonase. Atëherë parashtrohet dilema, në rregull kjo mund të jetë kështu, por cili institucion evropian është i ngarkuar të gjykojë nëse dikujt i kufizohen apo shkelen të drejtat e njeriut. Bëhet fjalë për Gjykatën e të Drejtave të Njeriut në Strasburg. Nëse i shohim vendimet e kësaj gjykate që kanë të bëjnë me të drejtat e njeriut në rajon, do të arrijmë në përfundimin se 14 aktgjykime vijnë nga ky institucion përkatës evropian për komunitetin maqedonas në Bullgari se nuk kanë të drejta pra të drejtat e tyre të njeriut janë ose të kufizuara ose të shkelura dhe të barabarta me zero krahasuar me komunitetin bullgar në Maqedoni. Katërmbëdhjetë me zero, kështu që nuk është kjo arsyeja. Të shohim se cila është arsyeja dhe çfarë fitojmë”, tha Mickoski.
Si shtroi pyetjen se “a mund dikush të na garantojë se kjo është gjëja e fundit që duhet të bëjmë, sepse garanca se kjo është gjëja e fundit dëgjojmë që nga fillimi i viteve nëntëdhjetë të shekullit të kaluar kur ndryshuam emrin, ndryshuam flamurin tonë, ndërruam kartëmonedhat, ndarjet territoriale, kishim një konflikt ushtarak, ndryshuam Kushtetutën disa herë dhe gjithmonë mesazhi nga Brukseli ishte, vetëm ky dhe ju jeni më të mirët në klasë dhe jeni ata që do të jeni të parët, por për fat të keq të gjithë kaluan ndërsa ne mbetëm në korridor duke pritur të na hapet dera, të ulemi të negociojmë”, theksoi Mickoski dhe shtoi se ky lloj politike duhet të ndalet dhe se ai personalisht është në politikë jo për t’u pasuruar, por për të lënë gjurmë historike duke mbrojtur interesat e popullit maqedonas.
Mickoski theksoi se populli maqedonas bëri gjithçka si asnjë popull tjetër deri më tani ndërsa në është radha e Evropës të bëjë diçka në këmbim, ndërsa në takimin e dhjetorit të Këshillit Evropian ishte dëshmi se nëse do, mund të bësh gjithçka.
“Ne si komb kemi bërë gjithçka, siç nuk ka bërë asnjë komb tjetër në Evropë, që vjen nga vendet që kanë qenë pjesë e Traktatit të Varshavës, siç nuk ka bërë asnjë komb tjetër. Tani duhet që Evropa të bëjë diçka për ne dhe e pamë se kur doni gjithçka mund të bëni, që nga takimi i dhjetorit të Këshillit Evropian kur nuk kishte konsensus për një çështje kyçe gjeostrategjike dhe kur rregulli i një vote u zëvendësua nga rregulli minus një person në hapësirën”, theksoi Mickoski dhe shtoi se zgjidhja e ofruar nga Qeveria është zbatim i vonuar i asaj që paraqet kusht, përkatësisht amendamenteve kushtetuese.
Sipas tij nëse me të vërtetë ekziston dëshirë në Bruksel, duhet të veprohet.
“Na vjen keq, por ne kemi bërë mjaft. Tani duhet të tregoheni të përkushtuar, domethënë të bëni diçka për këtë, do të thoja, një nga popujt numerikisht më të vegjël në Evropë, e ky është populli dhe qytetarët maqedonas”, tha Mickoski.
Ndryshe, me fitoren e VMRO-së, përkatësisht formimin e qeverisë së re, ka filluar edhe acarimi i raporteve midis Maqedonisë së Veriut me Bullgarinë dhe Greqinë. Me Bullgarinë, për shkak se kryeministri Mickoski tha mund të ketë ndryshim të Kornizës negociuese, e cila u kritikua ashpër nga Sofja. Ndërsa tensionet me Greqinë nisën kur presidentja Gordana Siljanovska Davkova, gjatë betimit nuk përmendi emrin kushtetues të vendit, Maqedoni e Veriut, por e përmendi emrin e dikurshëm, Maqedoni.
Kujtojmë se vendi duhet t’i bëj ndryshimet kushtetuese për të ecur përpara në rrugën eurointegruese. Ato nënkuptojnë shtimin e bullgarëve dhe kombeve tjera në Kushtetutë. Kjo vjen si rezultat i asaj që Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare. Megjithatë, negociatat nuk do të fillojnë derisa të bëhen ndryshimet kushtetuese.
