Rumania blen raketa amerikane për gati 600 milionë dollarë

Departamenti i Shtetit i SHBA ka miratuar shitjen e mundshme Rumanisë të 186 raketave me rreze të mesme AIM-120C-8 për 582 milionë dollarë, njoftoi në Uashington Agjencia e Bashkëpunimit të Mbrojtjes dhe Sigurisë (DSCA).

Rumania po forcon arsenalin e saj të raketave për avionët e saj luftarakë F-16 në një kohë kur fundi i luftës në Ukrainë nuk është ende në dukje.

Emri zyrtar i raketës është AMRAAM (Advanced Medium Range Air-to-Air Missiles) AIM-120C8 dhe është modeli më i fundit i kësaj rakete.

Sipas prodhuesit, drejtimi i versionit të ri të raketës është më i mirë në krahasim me ato të mëparshme dhe diapazoni është rritur, por ende mbahet sekret.

Rumania ka vendosur gjithashtu në listën e blerjeve aksesorët e zakonshëm që përfshijnë kontejnerë raketash, seksione shtytëse, seksione kontrolli, komplete telemetrike dhe pjesë këmbimi për koka luftarake, pajisje kriptografike KGV-135A, pajisje testimi dhe riprogramimi të municioneve, si dhe pajisje dhe softuer për mirëmbajtjen dhe trajnimin e personelit.

Përveç avionëve F-16, Rumania do të përdorë në të ardhmen raketa AMRAAM edhe në avionët F-35, pasi planifikon t’i blejë ato.

Disa vende përdorin raketa AMRAAM AIM-120 dhe modelet C8 deri më tani janë porositur nga Koreja e Jugut, Japonia, Arabia Saudite, India, Tajvani, Emiratet e Bashkuara Arabe, Gjermania, Suedia, Danimarka, Holanda, Norvegjia, Republika Çeke, Polonia, Hungaria, Rumania, Filipinet, Izraeli dhe Turqia./abcnews.al