Kundërshtoi luftën në Ukrainë, vdes në burg 39-vjeçari rus

Një pianist rus, i cili u burgos pasi kritikoi sulmin ndaj Ukrainës, ka ndërruar jetë në burg. Pavel Kusnir, 39 vjeç, vdiq në një burg në Birobidzhan, një qytet në një rajon të largët të Lindjes së Largët në kufi me Kinën.

Vdekja e tij nuk është bërë e ditur zyrtarisht.

“Kemi marrë letra nga shokët e tij të burgosur, nuk ka më asnjë dyshim për faktin se ai ka ndërruar jetë”, tha për Current Olga Romanova, kryetarja e një organizate joqeveritare që mbron të burgosurit.

Sipas Romanova, ai vdiq në grevë urie.

Sipas medias Vot Tak, që nga nëntori i vitit 2022, pianisti kishte publikuar katër video në një kanal në YouTube të ndjekur nga disa dhjetëra persona, në të cilat ai kritikonte Kremlinin dhe pushtimin e Ukrainës.

Në një nga këto video, të parë nga AFP, ai deklaroi para kamerës, “poshtë regjimi fashist Putin”, “liri për të burgosurit politikë” dhe denoncoi masakrën e Bucha, pranë Kiev, për të cilin përgjegjësia i atribuohet ushtrisë ruse.

I diplomuar në Konservatorin Tchaikovsky në Moskë, i cili konsiderohet si një nga shkollat ​​​​më të mira të muzikës në vend, Pavel Kusnir ka qenë solist i Filarmonisë Birobidzhan që nga viti 2023.

/abcnews.al