Çfarë do të thotë në të vërtetë etiketa ‘bio’ mbi ushqimet në Zvicër?

Të gjitha supermarketet kryesore zvicerane kanë produkte të përcaktuara si “bio”, që u referohet metodave të tyre të bujqësisë “organike” ose të prodhimit. Por çfarë përfaqëson saktësisht kjo etiketë?

Në deklaratën e saj për shtyp të publikuar në qershor 2024, Bio Suisse, një grup ombrellë për prodhuesit e ushqimeve organike, tha se banorët e Zvicrës janë kampionë ndërkombëtarë “bio”.

“Me konsumin prej 454 frangash për frymë, Zvicra renditet e para në krahasim ndërkombëtar”, tha organizata. “Në asnjë vend tjetër evropian shporta e mallrave organike nuk është aq e madhe”.

“Për sa i përket preferencës për ushqimin organik, Zvicra është përpara Danimarkës, Austrisë, Luksemburgut dhe Suedisë. Gjermania vijon në vendin e gjashtë dhe Franca në vendin e shtatë”, shtoi Bio-Suisse, transmeton albinfo.ch.

Ky zbulim nuk është befasues, sepse konsumi i këtij lloji më të shtrenjtë të ushqimit lidhet drejtpërdrejt me të ardhurat: sa më i pasur të jetë vendi, aq më shumë banorët e tij janë të gatshëm të shpenzojnë për produkte organike.

Çfarë do të thotë një etiketë ‘bio’ në Zvicër?

Me pak fjalë, produktet organike duhet të plotësojnë standarde shumë më të larta dhe të përputhen me më shumë kërkesa sesa ushqimet ‘konvencionale’ në mënyrën se si ato rriten dhe prodhohen.

Ndryshe nga shumica e metodave konvencionale të prodhimit, bujqësia organike është më e qëndrueshme – domethënë, mbron mjedisin dhe ruan burimet në vend që t’i varfërojë ato.

Gjithsej 7,362 fermerë dhe prodhues organikë janë anëtarë të Bio Suisse.

Përveç kësaj, më shumë se 2,300 operacione jashtë vendit janë gjithashtu të certifikuara sipas standardeve Bio Suisse, që do të thotë se metodat e tyre të bujqësisë/prodhimit janë ekuivalente me ato të praktikuara në Zvicër.

A mund t’i besoni një etikete ‘bio’, apo është thjesht një zhurmë e madhe (siç pretendojnë disa njerëz?)

Në Zvicër, ky proces kontrollohet rreptësisht nga rregullore të ndryshme të bujqësisë organike, të cilat zbatohen nga Zyra Federale për Bujqësi (BLW).

Kjo do të thotë se çdo fermë që prodhon, përgatit, tregton ose importon produkte organike inspektohet dhe certifikohet të paktën një herë në vit nga një prej katër organizmave certifikues të akredituar dhe të miratuar në Zvicër, shkruan thelocal.

Këto ligje përcaktojnë gjithashtu parimet me të cilat duhet të bëhen produktet bujqësore dhe ushqimet e etiketuara si organike, dhe cilat substanca jo toksike janë të autorizuara për përdorim në bujqësinë organike dhe për përgatitjen e ushqimit organik.

Pse produktet organike janë më të shtrenjta se ato konvencionale?

Ndër arsyet kryesore janë standardet më rigoroze të prodhimit dhe certifikimit, të cilat duhet të plotësojnë të gjitha kërkesat e përcaktuara nga BLW.

Gjithashtu, kostot operacionale të përfshira në përdorimin e plehrave natyrore, pa pesticide dhe ushqimit të kafshëve me cilësi të lartë, janë më të larta në bujqësinë organike sesa në atë konvencionale.

Për më tepër, furnizimi me ushqim organik në supermarketet zvicerane është më i kufizuar se ai i zakonshëm, gjë që i shtyn çmimet në rritje.

Dhe pastaj është kjo pyetje e bërë shpesh: a është ushqimi organik në Zvicër vërtet më i shëndetshëm?

Disa njerëz do të betohen për cilësinë më të mirë dhe vlerën më të lartë ushqyese të produkteve organike, ndërsa të tjerë do të thonë se përfitimet janë të ekzagjeruara.

Nuk ka asnjë përgjigje të qartë për këtë pyetje, përveç kësaj: disa studime kanë treguar përfitime të mundshme shëndetësore të ushqimeve organike në krahasim me ushqimet e rritura duke përdorur procese konvencionale.

Megjithatë, ka informacion të kufizuar për të vërtetuar se si këto dallime mund të japin përfitime të përgjithshme shëndetësore.

Por autoritetet e Cyrihut besojnë në ‘fuqinë’ e ushqimeve organike: në vitin 2022, ata urdhëruan që shumica e ushqimit të shërbyer në spitalet e qytetit, qendrat e kujdesit, objektet e kujdesit për fëmijët dhe shkollat ​​të ishin organike.

The post Çfarë do të thotë në të vërtetë etiketa ‘bio’ mbi ushqimet në Zvicër? appeared first on Albinfo.