Kamberi flet për protestën në Preshevë: Mesazh për Beogradin!

Deputeti i vetëm shqiptar në Parlamentin e Serbisë ka folur për protestën e mbajtur të hënën në Preshevë kundër shtypjes dhe diskriminimit që po ushtrohet ndaj shqiptarëve nga autoritetet serbe.

Ai tha për RTK-në se qëllimi i kësaj proteste është që Beogradi zyrtar të detyrohet të zbatojë marrëveshjet e arritura më parë, të nënshkruara nga vetë ata, përcjell Albinfo.ch.

Kamberi tha se ka pasur një plan të hartuar nga Këshilli Kombëtar Shqiptar, bashkë me OSBE-në, ku parashihej afatizimi i integrimit të shqiptarëve të Luginës, duke shtuar se kaluan disa vjet dhe ende nuk është zbatuar ai plan.

“Më 2022, Këshilli Kombëtar Shqiptar kishte nisur një nismë bashkë me OSBE-në për të hartuar një plan aksionar, në të cilin përcaktohen datat dhe afatet e integrimit të shqiptarëve të Luginës dhe, ja, tani jemi në vitin 2024 dhe akoma ia plan nuk ka filluar”, deklaroi Kamberi.

Ai më tej theksoi se kjo protestë qytetare ka për qëllim që, krahas angazhimit tonë politik e institucional, të përdoret edhe ky mekanizëm në mënyrë që Beogradi zyrtar të obligohet të përmbushë detyrimet e veta.

Kamberi, mes tjerash, ka folur edhe për pasivizimin e  adresave të shqiptarëve të asaj ane që, sipas tij, ky është një mekanizëm i Serbisë për shpopullzimin e shqiptarëve nga ato vise të banuar me shqiptarë, derisa përmendi një varg pikash të marrëveshjeve me shtetin serb, të cilat ende nuk janë përmbushur, ndër të tjera mosnjohja e diplomave etj./Albinfo.ch

The post Kamberi flet për protestën në Preshevë: Mesazh për Beogradin! appeared first on Albinfo.