Të rinjtë e HERA-s në transformimin gueril të Shkupit, pjesa urbane e qytetit u bë platformë për komunikim të hapur

Në Ditën Ndërkombëtare të Rinisë, 12 gusht, “HERA YOUTH” organizoi një aksion gueril në Shkup me sloganin “Ndrysho imazhin, ti je dallimi”, duke theksuar rolin e rëndësishëm të të rinjve në formësimin e së ardhmes së shoqërisë sonë. Nëpërmjet organizimit të ekspozitave interaktive, instalacioneve të artit të rrugës dhe dialogëve publikë, HERA YOUTH krijoi me sukses një atmosferë pozitive dhe mbështetëse që frymëzoi rininë dhe komunitetin e gjerë në qytetin tonë, transmeton Portalb.mk.

Shkupjanët sot i panë mesazhet në disa lokacione:

• “Rinia e forcuar sot do të thotë një e nesërme më e mirë”
• “Liria, kreativiteti, rinia – kjo është fuqia juaj”
• “Nuk je kurrë shumë i ri për të ndryshuar të ardhmen” dhe shumë të tjera.

Aksioni gueril u organizua me idenë e ndërgjegjësimit të të rinjve duke theksuar konceptin se idetë e tyre, përfshirja e tyre në jetën shoqërore është e rëndësishme për ta. Në këtë mënyrë, pra me përfshirjen e tyre do të shfrytëzohet në mënyrë aktive potenciali dhe kapitali i tyre dhe njëkohësisht do të motivohen të jenë pjesë e të gjitha proceseve që i prekin. Të rinjtë, si bartës të së ardhmes, kanë një aftësi dhe fuqi unike për të iniciuar transformime të shumta pozitive në komunitetet e tyre dhe më gjerë. Nëpërmjet aktivizmit rinor, të rinjtë mund të luftojnë për të drejtat e tyre, të avokojnë për ndryshime sociale, të gjenerojnë inovacion dhe kreativitet dhe të gjejnë zgjidhje të reja për problemet me të cilat përballen.

“Shkupi ka lexuar sot mesazhet “Kur mendoj për dashurinë, mendoj për ty” dhe “A beson në njeriun e duhur në kohën e gabuar”. Thelbi i mesazheve është në një nga fokuset kryesore të të rinjve, pra dashuria, si dhe marrëdhëniet adoleshente. Kujdesi për të rinjtë dhe zhvillimin e tyre dhe realizimi i potencialit të tyre është në shëndetin e tyre dhe investimi në edukimin gjithëpërfshirës seksual është thelbësor për zhvillimin e tyre. Edukimi gjithëpërfshirës mbulon të gjitha aspektet e seksualitetit, nga ato fizike te ato emocionale dhe sociale, dhe i ndihmon të rinjtë të marrin vendime të informuara për shëndetin e tyre seksual dhe riprodhues”, njoftojnë nga Hera.

Përmes këtij aksioni, “HERA YOUTH” vuri në dukje nevojën e promovimit të komunikimit të shëndetshëm dhe ndërgjegjësimit të të rinjve përmes forcimit të mekanizmave të shoqërisë dhe zbatimit të edukimit seksual gjithëpërfshirës, ​​sepse vetëm kështu mund të zgjidhen problemet e shtatzënisë së adoleshentëve dhe vetëm në këtë mënyrë do të mund të shfrytëzohet plotësisht potenciali i çdo të riu në vendin tonë.